ADA Universiteti “Bir Müəllimin Manifesti” təhsil proqramının 2022-2023-cü tədris ilində iştirak üçün qəbul elan edir

İki semesterdən ibarət olan “Bir Müəllimin Manifesti” ixtisasartırma proqramı yerli və xarici professor-müəllim heyəti tərəfindən keçiriləcəkdir. Proqram əyani və onlayn formatda aparılacaqdır. Əyani formatda proqram ADA Qazax Mərkəzində, ADA Universitetində və ADA Universitetinin Vaşinqton Mərkəzində keçiriləcəkdir.

İştirak üzrə tələblər və seçim meyarları:

• Bakı və Sumqayıt şəhərləri istisna olmaqla, Azərbaycanın digər şəhər və rayonlarında işləyən orta məktəb müəllim və direktorları;
• Ən azı 3 (üç) il fənn sahələrinin tədrisində pedaqoji təcrübəsi olan orta məktəb müəllim və direktorları;
• Namizədlərin ingilis dili bilikləri orta səviyyədə (intermediate) olmalıdır. İngilis dili biliklərini təsdiq edən minimum TOEFL 44-49/ IELTS 5/ Duolingo 75 beynəlxalq imtahan nəticələri olanlar müvafiq sənədi təqdim etməlidirlər. Namizədlərin ingilis dili səviyyəsi, həmçinin ADA Universitetinin İnglis Dili proqramının keçirdiyi test vasitəsilə də müəyyən edilə bilər.

Tələb olunan sənədlər:
 

1. Tərcümeyi-hal
2. Ərizə forması
3. Şəxsiyyət vəsiqəsinin surəti

Maraqlanan namizədlər sənədləri 19 sentyabr 2022-ci il tarixinədək [email protected] elektron ünvanına göndərə bilərlər.